तस्बीरी ताखा

गेट-वे, फैजाबाद, १८८० ई.

2012-01-19T13:29:00.000+05:30

ई फैजाबाद के गेट-वे कै सन १८८० कै फोटू आय। ई जानकारी नाहीं है हमरे लगे कि यहिका के खींचे रहा। ई फोटू हमरे लगे तक भाई दीपांकर पहुँचाइन। दीपांकर भाई क सुक्रिया! ई फोटू १८५७ के पहिल आजादी की लड़ाई के बाद कै आय, नबाबी खतम होइ गै रही। अवध कै राजधानी फैजाबाद से लखनऊ पहिलेन जाय चुकी रही।

सादर/अमरेन्द्र अवधिया

तरे संतोष जी कै कमेंट अहै, जौन यहि फोटू के बारे मा बहुत कुछ कहत अहै, वहिका हम ‘अपडेट’ के रूप मा रखत अहन:

अपडेट: संतोष जी कै कहब है:

वाह अमरेन्द्र जी ! बहुत ही दुर्लभ फोटो आपने मुहैया कराई है ! दीपंकर जी को धन्यवाद ! यह गेट आज भी मौजूद है, कमोबेश इसी हालात में ये आज भी है ! दरअसल यह गेट गुलाब बाडी (नवाब शुजाउद्दौला का मकबरा ) से चौक के रास्ते में है ! इस तरह के कुल चार गेट है और बीच में आज का चौक कहा जाने वाला इलाका है ! चारो गेट के बीच की जगह कम से कम १.५ वर्ग किलोमीटर (अनुमान है मेरा ) होगी और इस घिरे हुए स्थान में नवाब के रहने की जगह , मस्जिद और बाज़ार था ! हालकी तस्वीर अब बदल चुकी है ! पहले चारो गेटों को मिलाती हुई एक बड़ी उची चाहरदीवारी थी जो अब गायब हो चुकी है, हाँ ! कही कहीं अवशेष जरुर हैं ! अब इस गेट के तीनों दरवाजों में से दो दरवाजों (बाएं और दायें) से होकर पकी सड़क चौक के लिए जाती है ! बीच का दरवाजा दोनों तरफ से बंद कर दिया है ! इस गेट के उपरी हिस्से की कई खिडकियों को भी बंद कर दिया है ! आजादी के आस पास इस गेट के उपरी हिस्से में नजूल का आफिस बना दिया था ! संभवत सन २००२ में वो आफिस स्थानांतरित कर हो गया और ऊपर के हिस्से बंद ही रहते हैं ! इसमें थोडा थोड फोड़ के एक गेट के अंदरुनी हिस्से में एक दूकान बना कर किसी को पत्ते पे दिया गया था ,लेकिन अब वह दूकान भी बंद है ! हाँ ! ऊपर के कुछ हिस्से में अभी भी एक आध परिवार (पता नहीं वैधानिक तरीके से अन्य) अभी भी रहता है ! इस गेट के दुसरी तरफ (गुलाब बारी की तरफ ) के बाएं और दायें अस्तबल बने हुए थे ! वे अस्तबल अभी भी वजूद में हैं , बस बाहर से आपको समझ में नहीं आएगा ! अस्तबल के एक हिस्से को रिनोवेट करके आज की शहर की कोतवाली का वजूद में लाया गया , जो अभी भी है ! अस्तबल के ज्यदातर बाकी हिस्सों पर चूड़ी हारों का कब्ज़ा है और चूड़ियों की कई दूकान उसमे है ! बाएं और दायें के इलाके पूरी तरह आबादी में तब्दील हो चुके हैं ! आज की डेट में अनीस चकबस्त पुस्तकालय (जहाँ आप गए थे )भी इस चित्र के दाहिनी तरफ है ! कुल मिला कर , यह तस्वीर देखने के बाद पुराने फैजाबाद की एक झलक तो मिल ही गयी ! आभार !

सबका नये साल २०१२ कै बधाई :)

2012-01-01T01:00:00.000+05:30

सबके ताईं नवा साल २०१२, ग्यान औ कर्म से पूर्ण हुवै!

सर्वमंगला क्यार उपदेश है:
“ ग्यान कर्म-बिन लंगड़ बेटा,
कर्म ग्यान-बिन अन्धा।
जौ सम्हारि के जुवा उठावा,
तौ न पिराये कन्धा॥
ब्यक्त भगौती लिहे खड़ी बर,
तू पउब्या मुँह माँगे।
बिना परिसरम से मुल कानी,
कौड़िउ हाथ न लागे॥ ” ~ आचार्य विश्वनाथ पाठक

~सादर/अमरेन्द्र अवधिया

मलिकाए-गजल बेगम अख्तर कै कोठी(फैजाबाद)

2011-12-21T10:53:00.000+05:30

मलिकाए-गजल बेगम अख्तर कै कोठी

मसहूर उपसास्त्रीय औ’ गजल गायिका अख्तरीबाई फैजाबादी यानी बेगम अख्तर कै गौनई सुनि-सुनि के बड़ा भयेन। मन मा ढेर उछाह यहि बात का सोचिके अहै कि यतनी महान सख्सियत कै जन्म-जनपद फैजाबाद है, जहाँ कै हमहूँ अही। अबकी घरे गयेन तौ खवासपुर-रीडगंज-फैजाबाद मा मौजूद बेगम अख्तर की कोठी देखै कै हमार मन हुलासा रहा। देखेन. औ फोटुवौ खींचेन। यहि मकान मा बेगम अख्तर के घरे कै केहू नाहीं रहत। यहि कोठी मा हमैं नबाब अंसारी नावकै यक सज्जन मिले, वनहीं से हमार बातचीत भै। “हियाँ से फोटू खैंचउ तौ पूरी कोठी आये”-यहौ नबाब भाई बतायिन! फोटू १७-१२-२०११ का खींचेन। अपनेन कैमरा से।

अवधी-कवि-छवि [५] : हरिवंश राय बच्चन

2011-11-27T10:57:00.001+05:30

हरिवंश राय बच्चन ( १९०७ - २००३ )

खड़ी बोली हिन्दी के साथ अवधी मा कविताई करै वाले सिरी हरिवंस राय बच्चन जी कै जनम २७ नवंबर सन्‌ १९०७ मा भा रहा। बच्चन जी अवधी इलाका इलाहाबाद कै रहवैया रहे औ अवधी मा काफी कवितायिउ किये हैं। अवधी मा कयिउ गीत लिखै के साथेन बच्चन जी ‘श्रीमद्‌भगवद्‌गीता’ कै अवधी अनुवाद किहिन। बच्चन जी कै अनूदित ‘जनगीता’ १९५८ ई. मा आयी। यहिकी भासा सुद्ध अवधी है। जनगीता कै कुछ पँक्तियन क देखा जाय: “यह अति उत्तम पावन ग्याना। / अनुभव-अवगत होइ सुजाना॥ / धर्म-सुसंमत सुगम सुबोधा। / अरु अनुसरत सुकर, वर जोधा॥ / अरजुन धरु मन अस बिस्वासा। / होइ कबहुँ नहिं एहिकर नासा॥ / जे मन महुँ श्रद्धा न धराहीं। / ते न धरहिं पगु एहि जग माहीं॥” हिन्दी फिल्मन केर मसहूर एक्टर अनताब बच्चन यनहीं कै सपूत हुवैं। बच्चन जी १८ जनवरी २००३ क दिवंगत भये।

~सादर/अमरेन्द्र अवधिया

अवधी-कवि-छवि [४] : बलभद्र प्रसाद दीक्षित ‘पढ़ीस’

2011-11-09T14:07:00.001+05:30

अवधी कवि पढ़ीस ( १८९८ - १९४२ )

कवि बलभद्रप्रसाद दीक्षित ‘पढ़ीस’ आधुनिक अवधी कवियन मा सबले जेठ कहा जइहैं। पढ़ीस जी कै जनम १८९८ ई. मा भा रहा। गाँव - अम्बरपुर। जिला - सीतापुर/अवध। खड़ी बोली हिन्दी , अंग्रेजी अउर उर्दू कै ग्यान हुवै के बादौ पढ़ीस जी कविताई अपनी मादरी जुबान मा यानी अवधी मा किहिन। १९३३ ई. मा पढ़ीस जी कै काव्य संग्रह ‘चकल्लस’ प्रकासित भा, जेहिकै भूमिका निराला जी लिखिन औ’ साफ तौर पै कहिन कि यू संग्रह हिन्दी के तमाम सफल काव्यन से बढ़िके है। पढ़ीस जी कै ग्रंथावली उ.प्र. हिन्दी संस्थान से आय चुकी है। पढ़ीस जी सन्‌ १९४२ मा दिवंगत भये।

~सादर/अमरेन्द्र अवधिया

अवधी-कवि-छवि [३] : त्रिलोचन शास्त्री

2011-11-08T08:30:00.000+05:30

अवधी कवि : त्रिलोचन शास्त्री ( १९१७ - २००७ )

खड़ी बोली हिन्दी मा ढेर कुल्ले कबिताई करै वाले वासुदेव सिंह ‘त्रिलोचन शास्त्री’ कै गिनती समकालीन अवधी कवियन मा बड़े गरब से कीन जात है। त्रिलोचन जी कै जनम २० अगस्त १९१७ मा जिला सुल्तानपुर/अवध के चिरानी पट्टी/कटघरा गाँव मा भा रहा। तमाम दिक्कतन कै सामना करत १९३६ मा कउनउ जतन संसकिरित मा ‘शास्त्री’ डिगरी लिहिन। त्रिलोचन कै साहित्तिक सफर पत्रकारिता से सुरू भवा अउर आगे हिन्दी साहित्त के खास तीन ’प्रगतिशील’ कवियन मा यक यनहूँ माना गये। यहीते इनकी अवधी कवितायिउ मा तरक्की पसंदगी लाजमी तौर पै देखात है। छुटपुट अवधी कविता लिखै के साथेन त्रिलोचन अवधी मा यक तगड़ी रचना ‘अमोला’ लिखिन जेहिमा उनकै २७०० बरवै यकट्ठा हैं। अवधी माटी कै हीरा त्रिलोचन ९ दिसंबर २००७ क दिवंगत भये।

~सादर/अमरेन्द्र अवधिया

अवधी-कवि-छवि [२] : वंशीधर शुक्ल

2011-11-07T06:29:00.001+05:30

अवधी कवि वंशीधर शुक्ल जी ( १९०४ - १९८० )

बिख्यात अवधी कवि वंशीधर शुक्ल कै जनम सन १९०४ मा भा रहा। गाँव : मन्योरा। जिला : खीरी-लखीमपुर/अवध। सुकुल जी के पिता जी कै नाव सिरी छेदीलाल शुक्ल रहा। छेदीलाल जी अपने समय क्यार अल्हैत रहे औ दूर-दूर ले आल्हा गावै जात रहे। कवि रहे। छेदीलाल जी कै १९१६ ई. मा असामयिक देहावसान होइ गा। बप्पा के यहि तिना काल कौलित होइ जाये से वंशीधर जी कै पढ़ायिउ-लिखाई भँवर मा पड़ि गै। इस्कूली पढ़ाई अठईं तक किहिन मुला स्वाध्याय के बलबूते संस्कृत-उर्दू-हिन्दी-अंग्रेजी कै ग्यान अर्जित किहिन। कविता करै कै सुरुआत बहुत पहिलेन से सुरू कै दिहे रहे। यहिसे कीरति आस-पड़ोस मा फैलति गै। गाँधी जी के आंदोलन मा सामिल भये। कयिउ बार जेल गये। समाजबादी रुझान कै मनई रहे। गरीबन के ब्यथा औ किसानन के व्यथा से इनकै काव्य भरा पड़ा है। ‘उठो सोने वालों सबेरा हुआ है..’ यनही कै लिखा आय। ‘उठ जाग मुसाफिर भोर भई..’ यनहीं लिखिन। वंशीधर जी लखीमपुर खीरी से बिधानसभा सदस्यौ रहे: १९५९-१९६२ मा। हुजूर केरी रचनावली ‘उत्तर प्रदेश हिन्दी संस्थान-लखनऊ’ से आय चुकी है। अपरैल-१९८० मा आजादी केर सिपाही औ अवधी साहित्त कै अनन्य उपासक वंशीधर शुक्ल जी ७६ साल की उमिर मा ई दुनिया छोड़ि दिहिन।

~अमरेन्द्र अवधिया

अवधी-कवि-छवि [१] : रमई काका

2011-11-05T13:50:00.001+05:30

अवधी कवि : रमई काका ( १९२५ - १९८२ )

अवधी के आधुनिक कबियन मा सबसे पापुलर कवि रमई काका कै जनम रावतपुर, उन्नाव जिला(अवध) मा दुइ फरौरी सन्‌ १९२५ क भा रहा। काका जी कै पूरा नाव है चंद्रभूसन तिरबेदी। काका केरी कबिताई मा व्यंग्य कै छटा जनता के जबान पै चढ़ि के बोलति रही। आजौ कविता कै उहै असर बरकरार अहै। १९४० से काका जी आकासबानी मा काम करै लागे अउर तब से काका जी कै ख्याति बढ़तै गै। आकासबानी लखनऊ से काका जी कै प्रोग्राम ‘बहिरे बाबा’ बहुतै सराहा गवा। काका जी के कार्यक्रम कै प्रस्तुति बी.बी.सी. लंदन से ह्वै चुकी है। इनकै कबिता चौपाल मा, किसानन के खेतन मा, मेलन मा, चौराहन पै सहजै मिलि जात है। ‘भिनसार’, ‘बौछार’, ‘फुहार’, ‘गुलछर्रा’, ‘नेताजी’ जैसे कयिउ काब्य-संग्रह हजारन की संख्या मा छपे अउर बिके। दूर-दूर तक अपनी लोक-भासा कै जस फैलाय के माटी कै ई सपूत अठारह अपरैल सन्‌ १९८२ क ई दुनिया छोड़ दिहिस!

~सादर/अमरेन्द्र अवधिया

सुमंत मिसिर जी : भारतीय टेनिस कै पितामह..!

2011-11-04T11:54:00.000+05:30

“I feel very sad. He was my first captain when we played as a two-man Davis Cup team in 1953.” ~ Ramanathan Krishnan when he was informed about the death of Sumant Mishra

सुमंत मिसिर जी .. साभार ‘द हिन्दू’ अखबार

सुमंत मिसिर जी भारतीय टेनिस कै पितामह कहा जात हैं। सुमंत जी कै जनम ११ जनवरी १९२३ क फैजाबाद/अवध मा भा रहा। यई १९४६ ई. मा नेसनल लान टेनिस चैमपियनसिप कै खिताब जीतिन। बरतानिया सासन मा ई खिताब जीतै वाले पहिला सक्स यई हुवैं। १९५२-५३ मा डेविस कप टीम कै कप्तान रहे। १९६३ से ’६७ तक अखिल भारतीय टेनिस संघ कै सचिव रहे। देस कै सबसे बुजरुज टेनिस खिलाड़ी सुमंत जी ३ सितंबर २०११ का दिवंगत होइ गये।

~सादर/अमरेन्द्र अवधिया

निराला केर दुइ पाती आचार्य महावीर प्रसाद द्विवेदी के नाम ! ( १९२३ ई. )

2011-05-09T08:39:00.001+05:30

यै पत्र अवधी पत्र-साहित्त कै धरोहर हुवैं। १९२३ ई. की जानी कौनी घड़ी मा लिखा गा रहे है! इनसे ई बात जानी जाय सकत है कि वहि समय गद्य मा खड़ी बोली कै धूम-धड़ाका न रहत तौ का जनीं केतना लेखन अवधी मा आइ जात! यई निराला पढ़ीस केर अवधी कबिताई का सराहत रहे, खुदौ पत्र लिखिन, मुल जाने कौन वजह रही कि खुद अवधी मा कविताई नाहीं किहिन! करते तौ नीक रहत! बहरहाल निराला केर ई दुई पाती हमरे सामने अहैं:

--------------------------------------------------

[ १ ]

महावीर प्रसाद द्विवेदी को

“मतवाला” कार्यालय।

बालकृष्ण प्रेस,

२२, शंकरघोष लेन,

कलकत्ता, २७/१०/१९२३

श्री १०८ कमलचरणनमां

विजया क असंख्य भूमिष्ठ

प्रणाम।

बाबा

लिखा रहै, कतों जाब। मुलो जाब नहीं भा। हियैं रहि गयन। कलकत्ते की पूजा दीख। ८-मी के दिन बाबू मैथिलीशरण ते भेट भै, राय कृष्णदास के साथ आये रहैं। ३/४ दिन कउनव माड़वारी की कोठी मं [ मँ ] रहे रहैं। स्वभाव के तो बड़े अच्छे हैं। एक एक ‘अनामिका’ दूनो जनेन का दीन। तब पढ़ि कै सुनावा। प्रसन्न खूब भे। कहेन पहिलेहे रचना बड़ी अच्छी जानि परी मुलो छंद समुझ मं [ मँ ] नहीं आवा। हम कहा, हमरी समुझ मं [ मँ ] यहि छंद ते तुम्हरे वीरांगना के अनुवाद के छंद मं [ मँ ] बहुत थ्वारै फर्क है; वह बेतुका कवित्व छंद है औ यहि मां कतों कवित्व छंद की ३/४, कतों १/२, कतों १/३ लाइन आवति है। महादेव बाबू हमरे परिचय मं [ मँ ] तुम्हार संबंध जोरेन तौ मैथिलीशरण कहेन कि हमका तौ वई बनायन हैं। यही तना की बहुतेरी बातैं होती रहीं। हमारि इच्छा है, अनामिका एक दईं तुमका पढ़ि कै सुनाई।

‘मतवाला’ की कविता औ समालोचना पढ़ि कै लिख्यो। भूल कतों होति होई तो सुधारब। ‘निराला’ की कविता मं [ मँ ] कहां का करैक चही, लिख्यो। यह सम्मति हमरेहे लगे रही।

आशा है अच्छे हौ औ घर मां अच्छी भलाई है। चि० कमला किशोर कस हैं,कानपुर कब जइहौ, घरवालेन क मलेरिया छूट की नहीं, सब लिख्यो।

दास

सूर्य्यकान्त त्रिपाठी

हम रहित हियैं हैं [ है ] । चहै समन्वय के पते पर लिख्यो चाहे मतवाला के पते पर चिट्ठी हमका मिलि जाई।

दास

सूर्य्यकान्त

[ पता : ]

Shreeman

Pandit Mahavir Prasad ji

Dwiwedi maharaaj

Daulatpur ( Raebareli )

[ पत्र दौलतपुर से जुहू कलां, कानपुर भेजा गया। ]

[ २ ]

महावीर प्रसाद द्विवेदी को

६/११/२३

श्री चरणेषु---

कृपापत्र पढ़ा। मतवाला कै संख्या दीख। सरस्वती संपादक के नोटन मं [ मँ ], न समुझि सकेन, भूलै काहे नहिंन। कारण लिखि देत्यो तो समुझि जाइत। अबै तो मतवाला की समालोचना के पुष्ट कारण ते भूलै जानि परत है।

सरस्वती सम्पादक के विषय मं [ मँ ] लिखै बैठेन तो हमहूँ ५/६ पृष्ठ लिखि डारा। मुलो पीछे जब जाना कि तुम्हारा समय अकारण नष्ट होई तब फारि डारा। याकन कहा, ‘द्विवेदी जी का प्रत्यक्ष नहिंन तो का भा सरस्वती ते परोक्ष सम्बन्ध तो है; उइ अपनी बिदाई मं [ मँ ] यह बात स्वीकार करि चुके हैं। अतएव सरस्वती का पक्ष उइ लेबे करिहैं। औ वहिका वई बनायन है [ हैं ] तो अपने रहत उइ वहिकै उल्टी समालोचना देखि सकत हैं?’ कुछो होय हमका युक्ति ते काम। बात युक्तिपूर्ण होई तो चित्त मं [ मँ ] बैठि जाई, न होई, अलग ह्वइ जाई।

हम जो रामायण पाठ आदि मं [ मँ ] बनियई क भाव राखा होब – अर्थात्‌ लोग हमका अच्छा कहैं औ हम नामी ह्वइ जाई – बड़े सच्चरित्र साधु महापुरुष कहाई – हे राम हम तुम्हार नाव लेइत है बदले मं [ मँ ] तुमहूँ कुछ दियव, तो जउन यहु ह्वय रहा है यहु ठीक है। यही तना का विपरीप [ विपरीत ] फल मिलत है। औ लोग प्रकृति का एक अध्याय पढ़ि कै समुझै वाली बहुती बातै पाय सकत हैं।

--- दास सूर्य्यकान्त।

[ साभार : निराला की साहित्य साधना-३/ संकलन: राम विलास शर्मा/ पृष्ठ: २७५-२७६ / राजकमल प्रकाशन ]

सादर;

अमरेन्द्र नाथ त्रिपाठी

कविता : कुपंथी औलाद ( रफ़ीक शादानी ) ..

2011-04-23T08:09:00.002+05:30

आज अवधी कबि रफीक सादानी कै कबिता “कुपंथी औलाद” आपके सामने है। सादानी जी बर्मा देस मा पैदा भा रहे अउर हुवाँ से परिवार समेत फैजाबाद-अवध आइ गा रहे। अति थोर आमदनी आदि के बावजूद अवधी मा कविता लिखै की चुनौती का स्वीकार किहिन, पुरहरे निभाइन। दुरजोग से पिछले साल फरौरी मा सादानी जी पूर्बांचल के साहित्तिक छितिज का बीरान कैके चला गये। दुरभाग से सादानी जी जैसे बेहद पापुलर अउर काबिल सायर की सायरी कै कौनौ संग्रहौ नाय आय सका है। हमार कोसिस रहे कि हुजूर की कबितन का जैसहूँ बनै, यहि ब्लाग/साइट पै हाजिर करी। हाजिर है कबिता “कुपंथी औलाद” ( आप नीचे यू-टुबही प्रस्तुति मा ई कविता सुनिउ सकत हैं ) :

कबिता : कुपंथी औलाद

“ औरन के कहे मा हम आयेन

काया का अपने तरसायेन

कालिज मा भेजि के भरि पायेन

तू पढ़ै से अच्छा घरे रहौ,

चाहे खटिया पै परे रहौ।

हम सोचा रहा लिखि पढ़ि जइहौ

आकास मा एक दिन चढ़ि जइहौ

पुरखन से आगे बढ़ि जइहौ

अब घर कै खेती चरे रहौ,

... चाहे खटिया पै परे रहौ।

जबसे तू इस्कूल गयौ

तू फर्ज का अपने भूलि गयौ

तुम क्वारै भैया झूलि गयौ

भट्ठी मा हबिस के बरे रहौ,

... चाहे खटिया पै परे रहौ।

तुमसे अच्छा रघुआ हरजन

डिगरी पाइस आधा दर्जन

अस्पताल मा होइगा सर्जन

तू ऊ ..............करे रहौ,

... चाहे खटिया पै परे रहौ।

हम सोचा रहा अफसर बनिहौ

या देसभक्त लीडर बनिहौ

का पता रहा लोफर बनिहौ

अब जेब मा कट्टा धरे रहौ

... चाहे खटिया पै परे रहौ।

फैसन अस तुमपै छाइ गवा

यक राही धोखा खाइ गवा

हिजड़े का पसीना आइ गवा

जीते जी भैया मरे रहौ,

... चाहे खटिया पै परे रहौ।

हर बुरे काम पै अमल किहेउ

कुछ पढ़ेउ न खाली नकल किहेउ

बर्बाद भविस कै फसल किहेउ

अब बाप कै सब सुख हरे रहौ,

... चाहे खटिया पै परे रहौ।

हम पुन्न किहा तू पाप किहेउ

हम भजन तू फिल्मी जाप किहेउ

गुंडई मा कालिज टाप किहेउ

जो मन मा आवै करे रहौ,

... चाहे खटिया पै परे रहौ।

अइसन जौ बिगाड़े ढंग रहिहौ

बेहूदन के जौ संग रहिहौ

जेस रफीक हैं वैसन तंग रहिहौ

पूलिस के नजर से टरे रहौ,

... चाहे खटिया पै परे रहौ।”

[ ~ अवधी कवि रफीक सादानी ]

सादर;
अमरेन्द्र नाथ त्रिपाठी

पसंघा: डा. अमर कुमार की टीप के चलते अपडेट के रूप मा कुछ जानकारी जोड़ित अहन। सादानी जी कै जनम १९३३ ई. मा बरमा ( आज कै म्यामार ) मा अत्तार दीन इमाम के घर भा रहा। बचपन हुवाँ बीता। बरमा से इनकर बप्पा इधर फैजाबाद आये। हुवाँ वै इत्र बनावै कै काम करत रहे। देस छूटा। नयी जगह पै जमब कठिन। कुछ समय बाद बप्पौ दुनिया छोड़ि दिहिन। रफीक कै जिंदगी बड़ी भंछत-जूझत बीती। बहुत कमै लोग जानत हैं कि सबका अपनी कविता से हसावै वाले, खुसी बाँटै वाले रफीक कै यक भाय अउर यक लरिका ( दुइ लरिकन मा ) तंगहाली मा दुनिया छोड़ि के चला गै रहे। रफीक मजबूरी का आपन ताकत बनाय लिहिन अउर कविता लिखि के खुसी रहै लागे, खुसी करै लागे। ब्यवसाय के छोट हुवै के कारन लोगै “कुँजड़वा” कहि के मजौ लियय से नाय चूके। फिलहाल ९ फरौरी २०१० का मुमताज नगर फैजाबाद कै रहवैया सादानी जी आपन इहलीला समाप्त कै दिहिन। जूझत-टकरात रफीक की किस्ती का किनारा मिलि गा, वनही कै कविता याद आवत है:

“ इनका उनका रफीक का गोहरावत हौ?

जब ऊ चहिहैं मिले किनारा, उल्लू हौ !! ”

यतनी जानकारी रही, साझा किहेन, अउर पता लगाउब, तौ फिर साझा करब। इनकी औरउ कबितन का अबहीं रखब, कल्ले-कल्ले :)

रामनवमी पै हार्दिक बधाई..यक सोहर ( कंठ : शकुंतला श्रीवास्तव )..

2011-04-12T10:31:00.000+05:30

सबका रामनवमी पै हमरी तरफ से हार्दिक बधाई !

आजै के दिन राजा दसरथ कै अँगना लरिकन से चहकि गा रहा। बहुत इंतिजार के बाद अवध-नरेस का लरिकन कै सुख मिला, यहि सुख मा पूरी अजुध्या सामिल है। तीनौ रानिन की खुसी कै सीमा नाय है। कौसिल्या के हरस पै तुलसीदास जी कहिन:

“ भये प्रकट कृपाला दीनदयाला कौसिल्या हितकारी

हरषित महतारी मुनि मन हारी अद्भुत रूप बिचारी। ”

संतान पैदा भये पै सोहर हुअत है। यही सोच के ई सोहर आपके सुनै खातिर रखत अहन, जेहिका सकुंतला स्रीवास्तव जी आपन कंठ दिहे हैं। सोहर मा दसरथ के अँगना के खुसी मा आपौ नहावा जाय !! सोहर:

सादर;

अमरेन्द्र नाथ त्रिपाठी

अन्ना हजारे..जनता कै अदालत..‘जियौ बहादुर खद्दरधारी’(रफीक शादानी)..

2011-04-11T06:41:00.003+05:30

हम चुनाव लड़ब तौ हारि जाब। जमानतौ जब्त होइ जाये। आज लोगै १०० रुपया, सराब कै बोतल, साड़ी अउर आन-आन समान लैके मतदान करत अहैं।

~ अन्ना हजारे

जौन मनई आज तक मुखियौ कै चुनाव नाय जीति सका, ऊ यहि बात कै सर्टिफिकेट दे कि फलाने बेइमान हैं या इमानदार? .. चुनाव लड़ौ, जनता के बीच से, फिर कुछ बोलौ, जनता से बड़ी कौनौ अदालत नाय।
~ अन्ना हजारे के ताईं नेता तारिक
अनवर कै समझाइस

(नीचे यू-टुबहे पीस मा सुना जाय सकत है।)

अन्ना हजारे बेसक चुनाव प्रक्रिया से जुड़ा नाहीं हैं, मुला भ्रस्टाचार के खिलाफ आवाज उठावै कै हक उन्हैं पूरा है। जनता के अदालत कै बात केतना सही मानी जाय, जब यही अदालत जाने केतना भ्रस्टाचारिन का मुसलसल जितावत रहत है, ई वही अदालत है जेहिका निरच्छर अउर सोच-बिहीन राखि के सदियन से मलाई काटी जाति अहै। यही मलाई मारू तबका कै देन है कि लोगै ईमान की तरह आपन वोटौ बेंचत अहैं, जेहकै सीधी सीधी बात अन्ना जी किहिन हैं। यहि स्थिति मा खद्दरधारी नेतन की जमात से अलग कै केहू नेतन के भ्रस्टाचार पै अंगुरी देखाये तौ इन नेतन का मिरचा लगबै करे, जेहका तारिक अनवर की तिलमिलाहट मा देखा जाय सकत है। ई देस/संविधान/संसद/बिधानसभा कै बदकिस्मती कही जाये कि यही जनता केरी अदालत से जाने केतना खूनी/कतली/बाहुबली/ठेलुहै सफलता के साथ चुनाव जीतत हैं, अपने हथकंडन के चलते। यहिलिये यहि जनता के अदालत कै सीमा है।

समय अस है कि भ्रस्टाचार संस्कृति कै हिस्सा बनत जात है। दनादन बिकीलीक्स ! लोकतंत्र कै चौथा खम्भा कहावै वाले मीडिया कै धोखेदार चेहरा ! पढ़े – लिखे बुद्धिजीविन तक मा गहरे पैठा स्वारथ ! न केवल राजनीतिक बल्कि अकादमिकौ संस्थन मा ब्यापा परिवार-वाद ! उसूल पै जियय वाला परेसान और मखौल कै हिस्सा भर ! नाहीं समझ मा आवत कि आपन के अउर परावा के ! स्विस बैंक कै नजारा अलगै कहत है कि देसी लोगन से बड़े लुटेरे तौ बिदेसिउ नाय रहे ! यहि मौके पै कर्नाटक के पूर्व मुख्यमंत्री एच. डी. कुमारस्वामी कै कहब काबिले-गौर है कि “ आज के समय मा अगर महत्मा गाँधिउ जीबित होते तौ या तौ भ्रस्टाचार के जरिये बैंक मा पैसा यकट्ठा करते या फिर राजनीति छोड़ देते।” ऐसे समय मा अन्ना हजारे कै सबसे बड़ी सफलता ई है कि जहाँ सगरौ कूप मा भाँग परी है, वै कम-से-कम भ्रस्टाचार जैसे मुद्दे पै लोगन का सोचै के तरफ प्रेरित तौ करत अहैं, जन लोकपाल बिल कौनौ फाइनल फतह न आय। ई तौ यक्कै डग है, खामी यहू मा है, मुक भाँग-चेतना वाले माहौल से ई कुनमुनाहट लाख गुना भले अहै!!

नेतन के चरित पै रफीक सादानी कै ई कबिता ‘ जियौ बहादुर खद्दरधारी ’ सादानी जी के आवाज मा हाजिर है:

चलत चलत यहि यू-टुबहे पीस का देखै कै वकालत करब। यहसे काफी बातैं किलियर होइहैं:

सादर;

अमरेन्द्र नाथ त्रिपाठी

जय जय जय गिरिराज किसोरी..( कंठ : अश्विनी भिडे देशपांडे )

2011-04-10T13:24:00.000+05:30

शैलपुत्री

ई पोस्ट ड्राफ्ट कैके धरे रहेन, नौरातम के पहिले दिन खातिर। वहि दिन नेट से दूर रहि गा रहेन, यहिलिये आज ओके करत अहन। सबका नव संवत्सर बरस २०६८ अउर नौरातम पै ढेरन सुभकामना !!

“ जय जय जय गिरिराज किसोरी।

जय महेस मुख चंद चकोरी॥

जय गजबदन षडानन माता।

जगत जननि दामिनि दुति गाता॥

नहिं तव आदि मध्य अवसाना।

अमित प्रभाउ बेदु नहिं जाना॥

भव भव बिभव पराभव कारिनि।

बिस्व बिमोहनि स्वबस बिहारिनि॥ ”

[ ~ तुलसीदास ]

अब इन पँक्तियन का गायिका अश्विनी भिडे देशपापांडे के कंठ से सुना जाय:

सादर;

अमरेन्द्र नाथ त्रिपाठी

मुआवजा (कहानी) : डॉ० ज्ञानवती दीक्षित

2011-04-08T11:12:00.006+05:30

आजु अवधी साहित्यकार डॉ० ज्ञानवती दीक्षित की कहानी मुआवजा आप सब के तांय प्रस्तुत है. ज्ञानवती जी सहगल कालेज, नैमिषारण्य मां हिन्दी केरी व्याख्याता हैं. १३ अगस्त १९६६ मां जन्मी ई लेखिका हिन्दी औ अवधी दोनौ मां साहित्यरत हैं. इनकेरे लिखे कइयो कहानी संग्रह, उपन्यास, खंड काव्य औ प्रबंध काव्य प्रकाशित हुइ चुके हैं, कुछ अबहीं प्रेस मां हैं. ईके अलावा इनकेर कहानी, कविता, लेख, आलोचना, व समीक्षा आदि समय-समय पर बिभिन्न पत्र-पत्रिकन मां छपत रहत हैं...

मुआवजा

बरसन बाद रामनगर लौटे हन. नौकरी केरी बंदिस देस के अलग-अलग सहरन मां लइ जाति रही. यहि क्रम मां आपन गाँव कहूँ पीछे छूटत गा. अब तौ पता नाय बरसन पहिले देखे चेहरा पहिचाने जइहैं या नांय. जैसेन गाँव जाय वाली पगडंडी पर मुड़ेन-- एक अबूझ आवेग तेरे हृदय धड़कै लगा. हमार गाँव-- पियारा गाँव-- जहाँ केरी माटी हमरी सांसन मां महकत है-- जहाँ केरा एक-एक पेड़ हमार पहिचाना है . आय गए हन हमरे पियारे गाँव--
आय गए हन तुमसे मिलै के लिए. हमार आँखी भरि आयीं.

सामने लछिमी काकी केरा घर रहै . अरे यौ एतना टूटि-फूटि गा. कबहूँ यौ गाँव केरा सबसे खूबसूरत घर हुआ करति रहै. हरी-भरी फलिन केरी बेलन से ढका, माटी से लीपा-पोता, चीकन-चमचमात घर. माटी से बने कच्चे घर केतने खूबसूरत हुइ सकत हैं----यहिका उदाहरन रहै लछिमी काकी केरा घर . बड़ी मेहनती रहै लछिमी काकी. भोरहें से सफाई मां जुटि जातीं. उनकी धौरी गइयौ उतनै साफ़-सुथरी रहती रहै, जेतना गोबर से लीपा उनका आँगन. घर के समुंहे खूब साफ- सुथरा रहत रहै. हम बच्चा लोग हूंआ खेलै जाई, तौ धौरी गइया केर बढ़िया दूधौ पियैक मिलत रहै. कबहूँ काकी मट्ठा बनउतीं, तौ ताजा लाल- लाल मट्ठौ पियैक मिलत रहै. गाँव केरे दूध, दही अउर मट्ठे केरा स्वाद तौ गाँवै वाले जानि सकत हैं. सहरन मां वहिकी कल्पनौ दुस्कर है.

हम धीरे से आवाज दिहेन-- काकी- - -

अंदर से कांपत भई आवाज बाहर आई, खांसी के धौंसा के साथ-- कउन है?

-- हम हन, काकी. अर्जुन- - -.
हमार दिल धड़कि उठा . हमरे सामने मूर्तिमान दरिद्रता खड़ी रहै-- फटे-पुरान कपड़ा, चेहरा पर असंख्य झुर्री-- मानौ सरीर के हर अंग पर रोग कब्जा कै लिहिन होय . लछिमी काकी केरा अइस हाल होइगा ?
वा पहिले केरी सम्पन्नता कहूँ देखाय नाय परत है. घर केरी खस्ता हालत दूरि से आपन परिचय दै रही रहै.

--- अर्जुन हौ ? रामचन्न दद्दा के लरिका ?
बूढ़ी कोटरन मां धंसी आंखी हमार बारीक पर्यवेक्षण कै रही रहैं.

---हाँ ! काकी .
हमरे मुँह से सब्द जैसे कठिनाई से रस्ता बनाय पाय रहे रहै .

---तुम्हार अइसन हाल काकी ? घर मां सब कहाँ गे ? औ सरद कहाँ है ?

--- तुम्हरे काका के साथै , सब बिलाय गा, बचुआ.
काकी धम्म से आँगन मां परे पुरान तखत पर बैठि गईं. बरसा मां भीजि के तखत केरी लकड़ी फूलि आई रहै .

---बड़ा फूला-फला रहै यौ आँगन कबहूँ. आजु खाली हुइगा बचुआ. तुम्हरे काका के आंखि मुंदतै सारा जहान बैरी हुइ गवा. सरद का पुलिस पकरि लै गई .... ऊ .. जेल्ह मां है बचुआ .
काकी आँचर से आँखी पोंछइ लगीं .

--- जेल मां ??? काहे ?? का किहिस ऊ....?

--- कुछ किहिस होत तौ का गम रहै.... बचुआ.. ? निरपराध हमार लरिका जेल्ह मां बंद है . सूबा मां अइसी सरकार है भइया, जौ दलितन की बहू-बिटियन के साथ कुछ होइ जाय ऊँच-नीच, तौ हजारन केरा मुआवजा बाँटत है. गाँव मां हरिजन टोला मां अब रोज केरा तमासा होइ गवा है. हल्ला मचाय के कोई सवर्ण का फंसाय देव. कोई सुनवाई नाय. तुरतै हरिजन एक्ट लागि जात है. सिकायत करइ वाली का मुआवजा दीन्ह जात है. हमार सरद --- बेवा केरी अकेल औलाद रहै--- उनकी पइसन केरी हवस केर नेवाला बनिगा . हमार सवर्ण होब गुनाह होइगा बचुआ. हमरे साथ खड़ा होवइया कोई नाय रहै. कोई जांच, कोई फ़रियाद नाय सुनी गई. हमार मासूम लरिका, जौ कोई गाँव केरी मेहरुआ की ओर आँखी उठाय के देखतौ नाय रहै---ऊ... जेल्ह मां सरि रहा है --- बलात्कार केरे आरोप मां.

लछिमी काकी आँखिन पर आँचर धरि के रोवै लागीं. हम अवाक खड़े रहि गेन. यहु हमार वहै गाँव रहै-- जहाँ केरी बहू-बेटी दुसरे गाँव मां ब्याही होतीं तौ बड़े-बुजुर्ग वै गाँव केरा पानी नांय पियत रहैं, कि लडकियैं तौ गाँव भर की सांझी बिटिया भई. वै गाँव मां अइसा घटै लगा पइसन के लिए? तौ का तालाब केरा पानी गंदी राजनीति केरी लाठी से फटिगा ...? यहै संविधान रचा गा रहै, हमरे देस केरे लिए ..?

बूढी काकी केरी हिचकियैं हमरे बेजान कदमन केरा पीछा कै रही रहैं. हम धीरे-धीरे चलत भये गाँव केरा गलियारा पार कियेन. सामने हरिजन टोला रहै. धुत सराब पिए भैंरों काका जमीन पर लुढके पड़े रहैं. पास मां काला कुत्ता बइठा पूंछ हिलाय रहा रहै. दुइ किसोरी सिर पर घड़ा लिए पानी लेय जाय रही रहैं. छप्पर के अंदर से कोई मेहरुआ गन्दी-गन्दी गारी दै रही रहै. गारिन के साथ-साथ वहिके घर से मारापीटी की आवाजौ आय रही रहै. ई मारपीट मां छः सात छोटे बच्चा बिलखि-बिलखि के रोय रहे रहैं. पासै बजबजात, कूड़ा से पटी नाली रहै, वहे नाली मां एक सराबी लुढका पड़ा रहै. वहिके ऊपर माछी भिन-भिन करि रहि रहैं. हम राम सुमिरन का बड़ी मुश्किल से पहिचानेन. वौ हमरे साथ पढ़त रहै, अपरिचय के भाव लिए ऊ पास आवा. सिर के बाल खिचड़ी होइगे रहैं. चेहरा पर आश्चर्य के भाव रहैं.

---अरे! बाबू जी, आप ?

--- का बाबू जी, बाबू जी कै रहा है..... अरे! हमहन अरजुन- - .हम हंसिके कहेन .

---आव, घरै चलौ.
ऊ सकुचात भवा बढ़ा. चारपाई पर बैठत-बैठत हम देखेन ऊका घर पक्का बनिगा रहै. बाहर हैंडपंपौ लगा रहै.

---और सुनाव का हाल है ?

---हाल देखि तौ रहे हौ, भैया. नाली मां पड़ा है . यहु मुरारी है . भैंरों कक्का केरा लरिका . पीके नाली मां परा है हरामी. गाँव के पंडित टोला के लरिका पर अपनी बिटिया से मुकदमा कराय दिहिस..... बलत्कार कर. मुआवजा मिला है. हैलीकाप्टर से पुलिस के बड़े साहब आये रहैं. दै गे हैं. बस! दारू मुरगा उड़ि रहा है दूनौ बखत.....

---का कहत हौ ...? झूठै...?

---अरे भइया!!!!!! पइसे के लिए का-का नाय होत है हियां. महिमां तौ खाली रिपोट लिखवावै की है. एस० ओ० हरिजन है. आधा-आधा पइसा बटिगा ....पब्लिक पुलिस केर पुरान रिलेसन.
राम सुमिरन केरी आवाज दुःख मां डूबी रहै.

---तौ तुम इनका समझावत काहे नांय ? तुम तौ पढ़े-लिखे हौ...

---हमरे कहै से कोई काहे सुनै और मानै ..? हम मेहनत करइक कहित है... जब हराम केरा मिलि रहा है, तौ मेहनत को करी. एक-एक मेहरुआ केरे आठ- आठ , नौ-नौ लरिका हैं, एतनी योजना चलि रही हैं, आबादी बढाए जाव बस!
हम गाँव से निकरेन तौ मन बहुत दुखी रहै. का होइगा है हमरे प्यारे गाँव का...? पहिले कइस भाईचारा रहै ...? अदब , लिहाज, शर्मोहया सब नष्ट होइगा. घर पंहुचेन तौ लड़िका-बच्चा घेरि लिहिन.---

---पापा! पापा! गाँव से हमरे लिए का लाएव?
का बताइत, का लइके आयेहन. मन बहुत दुखी रहै. सोचेन टी० वी० देखी. टी० वी० खोलेन तौ आगी केरी लपटन मां धधकत एक घर देखाई पड़ा. कुछ गुंडा कूदि-कूदि के आगी लगाय रहे रहै. नेपथ्य से उदघोषक केरी आवाज आय रही रहै----- "जी हाँ! यह वही घर है.... जहाँ पं० जवाहर लाल नेहरू रहा करते थे....... जब वे पार्टी के प्रदेश अध्यक्ष थे. आज वर्त्तमान अध्यक्ष के बयान से क्रुद्ध होकर सत्ताधारी दल के समर्थकों ने इसे फूँक दिया है. अध्यक्ष को हरिजन एक्ट के तहत गिरफ्तार कर जेल में ठूंस दिया गया है. विरोध प्रदर्शन जारी है...."

हम टी० वी० बंद कै दियेन. सामाजिक परिवर्तन, न्याय, और समानता केरे नाम पर नई-नई पार्टी खड़ी भई हैं. हम सोचि रहे रहन इनका लोकतंत्र केरे कौने अध्याय मां पढ़ावा जाई ..??

डॉ० ज्ञानवती दीक्षित
सीतापुर

लोक गाथा : लाची सोनारिन..

2011-03-31T18:27:00.003+05:30

ललित सरमा कै कूची : अगिन असनान..

लोकगाथा के सिलसिले मा भरथरी की लोकगाथा के बाद आज लाची सोनारिन पै ई पोस्ट हाजिर है:

ई लोकगाथा लुपुत हुवै के कगार पै है। कुछै अंस हियाँ दीन जात हैं। करुना यहि लोकगाथा कै इस्थायी भाव है। कौनौ समय यहि लोकगाथा का लोगै अँसुवाय-अँसुवाय पढ़त/सुनत/गुनत/गावत रहे होइहैं, मुल आजु तौ लोगै भुलान बैठा हैं। यहि लोकगाथा मा यक लाची सोनारिन कै कहानी है, जेहिकै बियाह होइ गा रहा अउर यक राजपूत वहिपै मोहित होइ जात है। लाची कै उमिर सोलहै साल कै है। ऊ रजपुतवा समरथ है; लाची कै इमान लूटा चाहत है। ऊ प्रलोभन कै हिकमति लगावत है, मुदा लाची आपन जान दैके वहिकै सिकार बनै से बचि जात है। समाज लाची का सती कै आदर्स मान लियत है। रजपुतवा तौ अभय रहत है; ‘समरथ को नहिं दोष गोसाईं’ ! जाने केतनी बिधियन से औरतैं सतायी गयी हैं, सास्त्र केतना बोलत है, वहिका सास्त्र वाले जानैं, लेकिन लोकवानी तौ साफ साफ कहत है। कुछै अंस मा औरतन की मजबूरी कै ई करुन गाथा आपके सामने है:

लोक गाथा : लाची सोनारिन..

सोरहै बरस कै लचिया सोनरिया रे ना।

लचिया खिड़की बैठि लेय बयरिया रे ना।

घोड़ा चढ़ि चलि आवै रजपुतवा रे ना।

रामा परिगै लाची पे नजरिया रे ना।

चला गवा घोड़वा खिरिकिया रे ना।

रामा बाँधे राजा कदम की डरिया रे ना।

राजा चले गये कुटनी पँच महलिया रे ना।

देबै कुटनी तोहैं पाँच मोहरिया रे ना।

कुटनी लचिया भोरे महला लै आवौ रे ना।

...................

हिन्दी में भावार्थ: यह लोक गाथा स्त्री की परवशता की मार्मिक अभिव्यक्ति है। इसमें आद्यंत करुणा विद्यमान है। इस लोक गाथा में सोलह वर्ष की वैवाहित लाची सोनारिन का जिक्र है। उपरोक्त नौ पँक्तियों का अर्थ इस प्रकार है- “ सोलह वर्ष की लाची(नामक) सोनारिन खिड़की पर बैठी बयार(हवा) ले रही है। उसी समय घोड़े पर सवार एक राजकुमार/राजा/राजपूत आ जाता है। हे राम, उसकी नजर लाची पर पड़ जाती है। घोड़ा धीरे धीरे खिड़की की ओर बढ़ जाता है। राजा घोड़े को समीपस्थ कदम्ब के पेड़ की एक डाल में बांध देता है। वह वहाँ से सीधे कुटनी पन्च(इसका अर्थ नीचे विस्तार से है) के घर की ओर चल देता है। वह कुटनी को पाँच मोहरें देने की बात करता है, और कहता है कि कल भोर ही लाची को मेरे महल में ले आना। ” अंततः लाची प्राण त्याग देती है और अपने ईमान की रक्षा करती है। लोक-वाणी राजा की निन्दा करती है और लाची का यश गाती है। करुणा यह है कि यह तो एक लाची की कथा है, जाने कितनी स्त्रियाँ बर्बर सामंती दुराचार की शिकार हुई होंगी। सामंत-सत्ता अभय रही, और स्त्रियाँ मौत की देहरी लाँघती रहीं, दुराचार का शिकार होती रहीं।

कुटनी: स्त्रियों को बहला फुसलाकर उन्हें परपुरुष से मिलाने वाली स्त्री। दूती। कभी कभी दो लोगों में झगड़ा लगाने वाली स्त्री को भी यही कहते हैं। ‘कुटना’ इसी कर्म को करने वाले पुरुष को कहते हैं। इस क्रिया-कर्म को कुटनाना, कुटनापा या कुटनपन कहते हैं।

सादर;

अमरेन्द्र नाथ त्रिपाठी

भूपेंद्र दीक्षित : " जमाना जालिम है "

2011-03-27T23:25:00.004+05:30

होली के अवसर पर सीतापुर जाय का मौका लगा तौ अवधी के नाम चीन्ह कवि लोगन से मुलाकात भई. उनहीं मा एक युवा कवि पुरवा दासा पुर जिला-सीतापुर निवासी कवि भूपेंद्र दीक्षित हैं , जिन केर जन्म ३० जून १९६६ मां भवा रहै , उइ आजु काल्हि समाज सेवा औ स्वतंत्र लेखन मां व्यस्त रहत हैं, इनकेर अवधी काव्य संग्रह "दुइ पात" अबहीं प्रेस मां है , यहि के अलावा भूपेंद्र जी केर निरी रचनाएँ पत्र पत्रिकन मां छपती रहती हैं. इनकेर समसामयिक कविता हिंदी औ अवधी दोनौं मां सुनै का मिलति हैं, एक बानगी देखै...

जमाना जालिम है

है जबर्दस्त सरकार , जमाना जालिम है .
शासन करैं हैलीकाप्टर औ कार, जमाना जालिम है.

हर चौराहे पर लगे मुखौटा,
दीन दुखिन का कोऊ न साथी ,
का करैं आपन सिक्का खोटा ,
लात चलावैं घोड़ा- हाथी ,
लुच्चे लफंगे बनिगे सब ,
जनता के पहिरेदार , जमाना जालिम है ..

गाँवन का है बुरा हाल ,
कोऊ न उनका पुरसा हाल.
जेबैं भरैं , भरैं घर कोठी ,
जनता कै कौन उठावैं सवाल .
छूंछे खम्भा ठाढ़ ,
ना बिजली ना है तार, जमाना जालिम है .

भ्रष्टाचारिन का है बोलबाला ,
ईमान-धरम का है मुँह है काला .
वर्दी वाले गुंडा घूमैं ,
आम आदमी के घर पर ताला .
अपराधी छुट्टा घूमैं.
अपराध करत चहुँवार , जमाना जालिम है .

सत्य अहिंसा पर जो चलिहैं
वाहिका घर फूंका जाई ,
बात न्याय की जो करिहे ,
जेल मां ऊ ठूंसा जाई ,
गर- बिटवन की इज्ज़त ,
तौ रोजै होय तार – तार , जमाना जालिम है .

- भूपेंद्र दीक्षित
१६९, प्रतिभा निवास , सीतापुर , (उ.प्र.)

सबका होली कै सुभकामना !! .. “ दिगम्बर खेलैं मसाने में होरी ....... ” ( कंठ : पं. छन्नू लाल मिसिर )

2011-03-19T17:08:00.001+05:30

फोटू गिरिजेस जी के बिलाग से..

सबसे पहिले तौ सबका होली कै सुभकामना !! यहि मौके पै सुना जाय पं. छन्नू लाल मिसिर कै गावा ई गीत :

दिगम्बर खेलैं मसाने में होरी ..

खेलैं मसाने में होरी

.. दिगम्बर खेलैं मसाने में होरी ..

भूत पिसाच बटोरी ..

.. दिगम्बर खेलैं मसाने में होरी ..

लखि सुन्दर फागुन छ्टा के

मन से रंग गुलाल हटा के

चिता भस्म भरि झोरी ..

.. दिगम्बर खेलैं मसाने में होरी ..

गोप न गोपी स्याम न राधा

न कोई रोक न कौनौ बाधा

न साजन न गोरी ..

.. दिगम्बर खेलैं मसाने में होरी ..

नाचत गावत डमरू धारी

छोड़ै सर्प गरल पिचकारी

पीटैं प्रेत थपोरी ..

.. दिगम्बर खेलैं मसाने में होरी ..

भूतनाथ की मंगल होरी

देखि सिहाँय बिरिज कै छोरी

धन धन नाथ अघोरी ..

.. दिगम्बर खेलैं मसाने में होरी ..

अब सुना जाय यहि गीत कै यू-टुबही प्रस्तुति:

सादर;

अमरेन्द्र नाथ त्रिपाठी

कवि रमाशंकर यादव 'विद्रोही' [ ३ ] : इहवइ धरतिया हमार महतरिया ..

2011-03-16T22:38:00.000+05:30

कवि रमासंकर यादौ 'बिद्रोही' ३ दिसंबर १९५७ क सुलतापुर - अवध - के अइरी फिरोजपुर गाँव म पैदा भये। आर्थिक तंगी के चलते साइन-साइड कै पढ़ाई छोडि के नौकरी पकरिन। कुछ समय आंतर नौकरी छोड़ दिल्ली आये। दिल्ली आयके जेयन्नू ( J .N .U. ) म यम्मे कोर्स म दाखिला लिहिन। छात्र राजनीति से जुड़ा रहे और अबहिनउँ हिस्सेदारी लेत हैं। कुछ बिसंगति के चलते आगे कै पढ़ाई नाय होइ सकी। फिलहाल बिद्रोही जी जेयन्नू कैम्पस म अक्सर हम सबसे मिलत हैं अउर ग्यान कै बातैं करत हैं। बिद्रोही जी कै कविताई अउपचारिकपने से कोसन दूर है। यनके ताईं कबिता लिखै कै, सोझुवावै कै, बैठावै कै, छपुवावै कै, चीज नाय है। यै साफ तौर पै कहै वाली परथा कै कवि हैं, जेकर जोर पहिले आपन बात कहै पै रहत है। यानी सामने वाला पहिले समुझै अउर वहसे संबाद बनै। हाजिर है बिद्रोही जी कै कविता ‘इहवइ धरतिया हमार महतरिया’:

इहवइ धरतिया हमार महतरिया

अमवा इमिलिया महुवआ की छइयाँ

जेठ बैसखवा बिरमइ दुपहरिया

धान कइ कटोरा मोरी अवध कइ जमिनिया

धरती अगोरइ मोरी बरख बदरिया

लगतइ असढ़वा घुमड़ि आये बदरा

पड़ि गईं बुनिया जुड़ाइ गयीं धरती

गुरबउ गरीब लइ के फरुहा कुदरिया

तोरइ चले बबुआ जुगदिया कै परती

पहिलइ वरवा पथरवा पै परिगा

छटकी कुदार मोर खुलि गा कपरवा

मितवा न जनव्या जमिनिया क पिरिया

टनकइ खोपड़ी मोरा दुखवा अपरवा

खुनवा बहा हइ मोरा जइसे पसिनवा

तोर तोर परती बनाइ दिहे जमता

इहवइ धरतिया हमार महतरिया

मरेउ पै न जइहैं जमिनिया क ममता

उहवइ धरती मोरी होइ गइ हरनवा

इहवइ हयेन मोरे दुख के करनवा

सथवा निभाइ देत्या मितवा दुलरुआ

छिड़ी बा लड़ायी मोरे खेते खरिहनवा

हमरी समरिया गहे जे तरुअरिया

ओनही के गीत गाना ओनही के रगिया

हम खुनवा रँगि-रँगि रेसम कै पगड़िया

बबुआ बाँधब तोरे मथवा पै पगिया

हमरा करेजवा जनमवइ क बिरही

अब न बुतायी मोरी छतिया कै अगिया

हम छनही मा बारि के बुताइ देबइ दुनिया

बहुतइ बिरही मोरे बिरहा कै अगिया ..

[ ~ कवि रमासंकर यादौ 'बिद्रोही' ]

हिन्दी में भावार्थ: धरती के प्रति किसान का अप्रितिम प्रेम इस कविता में व्यक्त हुआ है। उस धरती से किसान का दूर कर दिया जाना, सहज रोष के रूप में कविता में आद्यंत विन्यस्त है। कवि वाणी है: (एक चित्र खींचा जा रहा है, कहिये तो भूमिका बनायी जा रही) आम इमली महुआ की छाया में जेठ/बैसाख की दोपहर के बीच थोड़ा सुस्ताना होता है। अवध की जमीन धान का कटोरा है। धरती अधीर होकर वर्षा की बाट जोहती है। असाढ़ लगते ही बादल घुमड़ आते हैं, धरती पर कुछ बूँदें पड़ जाती हैं गोकि धरती को ठंडक पहुँची हो। इस समय गरीब-गुर्बा जन फावड़ा/कुदाल लेकर युगों की परती पड़ी जमीन को तोड़ने निकलता है। पहला ही वार जैसे उस ठोस परती पर डालता है, कुदाल छनक जाती है। प्रभाव कुछ ऐसा कि जैसे सर पर गिरे और खोपड़ी दुख जाए। वह ऊसर/बंजर को उपजाऊ बनाने वाली कठिन प्रक्रिया सोचता है। अपार दुख सह कर उसने धरती को उपजाऊ बनाया है, इस जमीन से जुड़ी पीड़ा को कोई और क्या जाने, यही धरती उसकी माँ है, मरने पर भी इसकी ममता कहाँ जाने वाली!! उसकी इसी जमीन का हरण हो गया है। ( या कर लिया जाता है ) यही उसके दुख का कारण है। किसान कहता है: हे मित्रों/दुलारों , खेत/खलिहान में लड़ाई छिड़ी है, मेरा साथ निभा दो। इस संग्राम में मेरे साथ जो तलवार गहेगा, उसी का गीत गाया जायेगा, उसी की रागें छिड़ेंगी। मैं खून से रेशम की पगड़ी रंगूँगा और हे बबुआ, तुम्हारे माथे पर पहनाउँगा। मेरा कलेजा तो जन्म से ही बिरही है। इस छाती की आग कहाँ बुताने वाली ! हम सब संघर्ष की जोत जला कर इस अन्याय की दुनिया को बुझा देंगे। देखिये, मेरे बिरहे(काव्य-रूप) में कितना बिरह है, इसकी राग कितनी बिरही है। यानी संघर्ष की बहुतै उत्कंठा है।

नोट : ई कबिता बिद्रोही जी कै कबिता संग्रह ''नयी खेती'' से लीन गै है , जौन अबहीं कुछै महीना पहिले आवा है।

सादर;

अमरेन्द्र नाथ त्रिपाठी

यक मुलाकात ‘पद्म श्री’ बेकल उत्साही जी के साथ..

2011-03-08T16:53:00.003+05:30

कबि बेकल उत्साही जी कै नाव परिचय कै मोहताज नाहीं अहै। कबि बेकल उन गिने चुने सायरन मा हैं जिनकी कबिताई मा माटी कै महक भरपूर है। इनकी सायरी के सामे अवध की हसीन छाँव मा सुनैया/पढ़ैया देर तक मगन मन सुँहुताय सकत है। संजोग से यही महीना की ६ तारीख का बेकल जी से मुलाकात भै। यहि मुलाकात का इसमिरिति के आधार पै यहि पोस्ट मा उकेरित अहन:

साल भर पहिले अवधी सम्मेलन / साहित्य अकादमी-दिल्ली मा पहिली बार बेकल जी से मुलाकात भै रही। तबै से इच्छा रही बैठि के कुछ बात करै क मौका लागत, संजोग से दिल्लिन मा ई मौका फिर बना। लगभग तिरासी साल के बादौ यतनी सक्रियता कमै देखै क मिलत है, जस बेकल जी मा देखान। ठाट-बाटू साहित्तकारन से अलग बेकल जी बिना कौनौ औपचारिकता के मिले। वही सदासयता के साथ मिले जेस यक अच्छे सायर मा हुवै क चही। पहिले नाव-धाव काम-धाम आद बातैं पूछिन, वहिके बाद तौ जैसे पूरे अवध कै भूगोल उनकी आँखिन मा खिंचा हुवै, यही तरह यक से यक बात करत चला गये।

कौनौ बहुतै नाक-भौं सिकोड़ू पछिमहा कबौ बोला रहा कि इन पूरब के साकिनन से बतुवाव तौ जबान खराब होइ जात है। साइद परफूम सुँघैयन का माटी कै महक जँचत नाय, यही बात रही होये अस सोचै के पीछे। बहरहाल बेकल जी का खूब गरब है पूरब पै, यहिकी भासा पै, यहिकी सखसियतन पै, यहिकी कल्चर पै, यहिकी माटी पै। यक्कै साँस मा जाने केतना नाव गिनाय डारिन – राम , बुद्ध , तुलसी , कबीर , च्यवन रिसि , मियाँ सलार , घाघ , भड्डरी , बिरगेडियर उसमान , अब्दुल हमीद , बिनय कुमार , जिगर साहेब .. .. .. आद आद। हरदोई औ’ लखीमपुर खीरी मिलाइके यहिरी कै सगरौ इलाका पूरब मानत हैं। कहनाय है कि बस्ती के बाद फिर गोरखपुर-देवरिया मा भोजपुरी झाँकय लागत है। सन १९८६ मा जब राजसभा/संसद मा चुनि के गये तौ पहिली बार ‘पूर्वान्चल राज्य’ कै माँग रखिन, जेहिकै सबै बिरोध किहिन सिवाय दुइ-तीन जने का छोड़ि के। जाहिर है कि आजौ ई माँग चलति अहै जेहमा सियासी नखड़ा ढेर है, न कि संसकिरितिक सोच। राजनीतिक सफर कै कुछ बातौ बताइन। गौरतलब इहौ है कि ‘उत्साही’ नाव १९५२ मा पं. जवाहर लाल नेहरू काब्य-पाठ पै खुस होइके दिहे रहे।

बेकल जी का अवधी से बड़ा लगाव है। यही वजह से उनकी खड़ी बोली की सायरिउ मा अवधी रची बसी है। ब्यापक तौर पै बेकल जी अवधिउ मा लिखिन। अउर ई काम वै अपने कबिताई के सुरुआत से निबाहत अहैं। १९५२ से मंच पै अवधी कबिताई सुनावत अहैं। यहि समय वै यक तिकड़ी के रूप मा बहुत लोकप्रिय रहे। तीनौ जने रहे: १- खुद बेकल जी , २- मोती बी.ए. , अउर ३- गोपाल सिंह ’नेपाली’। बेकल जी अवधी मा पढ़त रहे, मोती बी.ए. भोजपुरी मा, अउर नेपाली जी खड़ी बोली मा। बेकल जी यक वाकया बताइन। यक बार स्याम नरायन पाड़े निराला जी से कहिन कि “ इन लोगन से कहौ कि बेकार का देहाती मा सुनावत अहैं ! ” निराला जी कहिन कि “ देखौ , तोहार ई ‘चित्तौड़’,‘हल्दीघाटी’ रहे न रहे , मुला इनकै कविताई रहे, यै माटी कै सायर हैं ! ” बेकल जी रमई काका , बंसीधर सुकुल जैसे अवधी कवियन के साथे यक लम्बा दौर गुजारिन। काका जी के साथे आकासबानिउ मा आपन भूमिका निभाइन । हम काका जी के साथ बिताये दिनन के बारे मा संस्मरन लिखै कै निबेदन किहेन। बेकल जी बतावत हैं कि पहिली बार जब वै लन्दन गये रहे, तौ हवाई अड्डा पै बीबीसी वालेन से इन्टर्ब्यू मा अपनी बात कै सुरुआत अपनी मादरे-जुबान अवधी से किहिन:

“ नाचै ठुमुक ठुमुक पुरवाई

खेतवन बाँह लियत अँगराई

देवी देउता सोवैं फूल की सेजरिया,

निराला मोरा गाँव सजनी।

बन उपवन हरियाली हुमसै

माटी सुघर बहुरिया।

बँसवाटी लौचा झकझोरै

यौवन मस्त बयरिया।

पेड़न पंछी चाँदी टोरै

नदिया बीच मछरिया

बरसै झूम झूम के सोने कै बदरिया,

निराला मोरा गाँव सजनी। ”

[ ~ बेकल उत्साही ]

बेकल जी की अवधी कबितन कै सँगरह डाइमंड पबलिकेसन से जलदियै आवै वाला है। अवधी गजल कै स्वाद लियै बरे हम सब इन्तिजारी मा अहन। अपने मा समाहित करै की अद्भुत छमता के चलते बेकल जी अवधी का बेजोड़ भासा कहत हैं। मुल्ला दाउद के चंदायन से लैके आज तक की अवधी केरि काब्य जात्रा का यहिकै परमान मानत हैं।

तुलसी , कबीर , जायसी जैसे कबियन के जन-जुड़ाव कै बेकल जी घनघोर तारीफ करत हैं। फिराक साहब का याद करत हैं अउर उनकी कही बात बतावत है:

“ तुलसी सायरी कै खुदा हैं अउर कबीर सायरी कै पैगम्बर ..! ” [ ~ फिराक गोरखपुरी ]

हुजूर केर कबीर की पसंदगी पै यनही कै लिखा सेर याद आवत है:

“ छिड़ेगी दैरो हरम में ये बहस मेरे बाद,

कहेंगे लोग कि बेकल कबीर जैसा था। ”

साहब तुलसी के सबद परयोग कै क्लासिकी का बरबस सराहत हैं। कहत हैं कि ‘नज़दीक’ फारसी कै सबद रहा लेकिन वहिका ‘नगीच’ बनाय के जनता के और नगीचे पहुँचाय दियब तुलसी कै काबिले-तारीफ कमाल है। ‘गरीबन नेवाजू’ सबद मा बहुवचन बनवै कै कला देखी जाय सकत है। तुलसी भासा के अस्तर पै दुनिया भर की अच्छाई का अइस मिलाइन कि वनकी रचना कै बिस्व ब्यापक परभाव परा अउर अवधी कै आपन भासाई आधारौ बखूबी बना रहिगा। बेकल जी कै कहब है कि भासा का लैके जे बहुत फर्चई-पसन्दी ( प्योरीटैरियन एप्रोच ) करत है वहका तुलसी से कुछ सिखै क चही। कहत हैं कि अंग्रेजी तक कै सबद जिनका जनता सुतारे लै चुकी हुवै, वन्हैं कबियन का अपनी भासा मा परयोग करै क चही। जिन भक्त कबियन कै जनम अस्थान पै विवाद है, उनमा तुलसिउ जी हैं। कुछ लोगै तुलसी जनम का बाँदा जिला से जोड़त हैं, मुला बेकल जी कहत हैं कि तुलसी गोन्डा जिला मा पैदा भा रहे। गोन्डा के पसका/राजापुर गाँव मा। कहनाय है कि यनके बाद तौ जइसे तुलसी नाव धरै कै परंपरै परि गै। तुलसीपुर मा यक संत तुलसीदास भये जे जानकी विजय लिखिन। सौरव/एटा मा यक तुलसी दास भये, रतना कै तालुक यनही से रहा। गोन्डा वाले तुलसीदास देखै-सुनै मा थोरक्‌ कम ठीक रहे अउर बिन बियाहेन रहि गा रहे। यनही तुलसीदास कै सिस्य गोन्डा कै रहवैया जगत दास रहे, जे बरवै मा खूब सायरी किहिन। बेकल जी तुलसी की कबिताई का साहित्तिक बनाव-सिंगार के तौर पै देखै कै हिमायती हैं, न कि केवल आस्था के तौर पै।

बरवै छन्द कै सौरभ अवधी साहित्त मा बिखरा परा है। बरवै छंद पै रहीम से जुड़ी घटना कै जिक्र बेकल जी किहिन। यहिकी कहानी बतायिन। रहीम दास कै नौकर छुट्टी पै चला गा रहा, नयी बियाहिता मेहरारू के लगे ढ़ेर दिन रहिगा, आवै लाग तौ चिन्ता हुवै लाग कि अब तौ रहीम बहुत बिगड़िहैं। मेहरारू दुइ लाइन लिखि के उन्हैं भेजिस:

“ प्रेम रीत कै बिरवा, लगेहु लगाय।

सीचन की सुधि लेउ, मुरझि न जाय॥ ”

जब रहीम इन लाइनैं का देखिन तौ यहि छंद पै रीझि बैठे। बड़े उत्साह मा नौकर का सजा दिहिनJ कहिन कि तोहार सजा है कि जाय के ई छंद तुलसीदास का दियौ, अउर कहौ कि रहीम भेजिन हैं, यहिमा कुछ लिखैं। गौरतलब है कि तुलसीदास रामायन यहू छंद मा लिखिन जेहिका बरवै रामायन कहत हैं।

आज के लेखन मा मुक्त छंद की बयार का बेकल जी बहुत ठीक नाय मनते। कहत हैं कि जौने देस मा बिटिया के बिदाई के समय कै रोवायिउ तरन्नुम मा हुवत है, वहि देस के लेखन का लय-छंद से यतना मुक्त हुअब बहुत अच्छा नाहीं है। आज की हिन्दी कविता कै जनता से दूरी कै यक वजह इहौ है। यही सिलसिले मा बेकल जी अपने ‘दोहिकू’ परयोग का बतायिन कि यहिमा १३-१६-१३ मात्रा पै हम भाव का साधेन। ई दोहिकू देखै लायक है:

“ गोरी तेरे गाँव में

पीपल बरगद टहल रहे हैं

मौसम बाँधे पाँव में। ”

अपनी सूरीनाम जात्रा के यक वाकये कै जिक्र किहिन। कहिन कि सूरीनाम मा यक बुढ़वा मनई खेते मा कुछ करत रहा, हम वकरे लगे गयेन और कहेन कि “ दादा , काव निरावत अहौ? ” एतना सुनतै दौरा दौरा लगे चला आवा और कहिस, “ हमरे देस से आवा हौ का? ” फिर मारे सनेह के रोवै लाग। “ जननी जन्मभूमिश्च स्वर्गादपि गरीयसी ! ”

बेकल जी के साथ..

बेकल जी का कुछ बातन कै अफसोसउ है, लोगन के मन मा परत मजहबी फाट बहुत दुखद है। कहत हैं कि मिलवा कल्चर का न समझ पाउब आज के समय कै बड़ी खामी है, जेहिकै लाभ दुइनौ तरफ कै मजहबी लोग उठाय रहे हैं अउर लोग गुमराह हुवत हैं। साहित्त कै जनता से दूर हुअब नुकसानदेय मानत हैं, कहत हैं कि हिन्दी का भासाई तौर पै गँवईं रंग-ढ़ंग से परहेज करब ठीक नहीं। अवधी का नयी तकनीकी से दूर रहै कै उन्हैं दुख है, कहत हैं कि जइसे भोजपुरी कै ‘महुआ’ आद चैनल बन रहे हैं, अवधिउ का यही तिना आगे आवै का चाही। ग्लोबल समय मा अवधी अपनी महान समरिधि का तकनीकी से हाजिर न कै सकै, ई बहुत बड़े दुख कै बात है। लोगन का यहि काम का जोर-सोर से सुरू करै क चाही।

   यहितरह जेतना कुछ याद आवा वहका लिखेन। खुदा से दुवा करित है कि बेकल जी दीर्घायु हुवैं, यही तरह सक्रिय रहैं, अवधी केर औरउ सँगरह आवैं, हम सबकी पीढ़ी का प्रेरना दियत रहैं ! आमीन !!

   लगे हाथ बेकल जी की आवाज मा ई गीतौ सुना जाय , जेहका हम बीबीसी से मोबाइल रिकार्ड के जरिये लिहेन है:

सादर;

अमरेन्द्र नाथ त्रिपाठी

सबका जलचढ़ी ( शिवरात्रि ) केरि सुभकामना ..

2011-03-02T20:15:00.004+05:30

मोहारे के सिवाले पै माई..

सिव द्रोही मम दास कहावा।

सो नर सपनेहुँ मोहि न पावा॥

सैव-बैसनौ के बीचे रारि अपनी आँखी अपने इलाका मा नाहीं देखेन। होइ सकत है कि कौनौ समय रहत रही हुवै, तौ तुलसी बाबा यक दुसरे कै अस मेल करायिन कि रामै कहत हैं - सिउ निन्दक हमैं सपनौ मा नाहीं पाय सकत, भले अपने का हमार दास कहावत हुवै। राम के इलाके मा सिव कै खूब पुजैती है। लोगै यहौ कहत मिलि जैहैं – ‘देवन मैहाँ संकर बाटे / नदियन मैहाँ गंगा।’ गाँउ मा हर घर मा तुलसी क्यार बिरवा मिले अउर वहिके तरे छोटे-छोटे पथरन के रूप मा संकर जी मिलिहैं, यतने सस्ते मा भला अउर देउता कहाँJ

गाँउ मा जलचढ़ी आवै के पहिलेन औरतै यक-दुसरे से पूछै लागति हैं – ’जलचढ़ी कहिया?’। जब ई दिन आइ जात है तौ भिनसारेन से तैयारी चालू होइ जात है। सुकर है कि यहि दिन कुछ खिचरी के बादौ न नहाय वाले जड़है नहाय तौ लियत हैंJ पूजा-अरचन कै समान यकट्ठा कीन जात है। संकर जी के देउथाने पै गाँउ भै जल चढ़ावत है, यही ताईं साइद जलचढ़ी बोलत हैं। संझलौके से सिउ-पूजा चालू रहति है – जथा सकती, तथा भकती। लोगै जागत हैं अउर गीत गावत हैं। यक ठवर गीत यहि तरह है:

सिउ भोले न जागैं जगाय हारी।

बरम्हा जगावैं , बिस्‌नू जगावैं ,

नारद जगावैं बजाय तारी ॥ सिउ भोले ० ॥

गंगा जगावैं , जमुना जगावैं ,

सरजू जगावैं लहर मारी ॥ सिउ भोले ० ॥

राधा जगावैं , रुकमिन जगावैं ,

गौरा जगावैं हिलाय दाढ़ी ॥ सिउ भोले ० ॥

लोक कै पुजिहर देउता सिउ के यहि तिउहार पै आप सबका हमार सुभकामना !!

जात-जात लोक गायक राम कैलास यादव कै गायी ई सिउ अस्तुति सुना जाय:

नोट: ई गीत हमैं दीपांकर मिसिर के किरपा से मिला, यहिते दीपांकर का सुक्रिया !

सादर;

अमरेन्दर..

कविता : राम-राम हरे-हरे ( बोधिसत्त्व )

2011-02-26T16:46:00.002+05:30

कवि बोधिसत्व

आज कवि बोधिसत्व कै कबिता आपके सामने रखत अहन। कविता है : “राम-राम हरे-हरे” ! यहि कबिता का अभय जी के बलाग से सादर लियत अही। अभय जी यहिकै अनुमति दिहिन, बोधि जी का मैसेज भेजेन तौ कौनउ जबाब नाय दिहिन। थोरा सुस्त परेन, मुला अभय जी भरोसा बढ़ाइन तौ नीक लाग। बोधि जी हिन्दी मा कबि के तौर पै फेमस हैं, वनकी यहि रचना मा हमैं अवधी कै भरपूर छ्टा देखान। कविता मा मिथकन के जरिये अपने समय-समाज कै बाति कही गै है। कबिता हाजिर है :

घरे-घरे दौपदी, दुस्सासन घरे-घरे।